happygirl

對身體有益的5款飲料！

大家都知道每日飲八杯水已經係指定動作，不過唔同飲料有唔同嘅功效，你又知唔知你每日飲落肚嘅飲品對身體有咩益處？

礦泉水

好處：身體從礦泉水所吸收到嘅礦物質比從食物來的容易，好似鈣同鎂可以促進新陳代謝，有助解決便秘排出毒素。 幾時飲：最好唔好煮沸，以常溫飲用比較好，而且最好喺進食前半小時或者沖涼後飲500至600ml。

薑茶

好處：薑可以令身體發熱，促進冒汗同新陳代謝。 幾時飲：一日飲一至兩杯就最好，不過唔好空肚飲用，咁樣反而會增進食慾。冬天手腳冰冷、患感冒，或者m痛時飲一杯黑糖薑茶，出一身汗就最舒服。

烏龍茶

好處：烏龍茶具有分解脂肪、燃燒脂肪同利尿作用，可將沉澱喺血管中嘅膽固醇排出體外。所含嘅單寧酸為眾茶中最高，具有促進胃液分泌嘅功效，提升腸道蠕動。 幾時飲：最好喺食飯後一小時飲，可去油膩及幫助消化。

綠茶

好處：經常飲綠茶有助降低血中膽固醇、代謝毒素、幫助消化，佢所含嘅氨基酸同豐富維他命C，仲能夠加強人體免疫能力。 幾時飲：空肚或者飯後飲都得。

氨基酸飲料

好處：一般嘅運動飲料都含有豐富嘅氨基酸，氨基酸能夠促進肌肉同骨骼健康。 幾時飲：最好喺運動過後，再配合生果一齊食，就可以幫助你補充失去嘅體力。